أسئله متكرره

أعزائي زوار مدونتي المحترمين..في الآونه الأخيره عجزت عن الرد على الرسائل المتزايده ..وأصبحت بصعوبه اجد الوقت لذلك..ولأن رسائلكم وأستفساراتكم تهمني..فقد خصصت هذه الصفحه للإجابه على اكثر الأسئله تكرارا منذ بدأي في العمل على التي شيرتس..وإن شاء الله ستجدون إجابات وافيه على أسئلتكم هنا..

لذلك اتمنى منكم إذا اردتم الاستفسار عن شيء قراءة الأسئله هنا مبدئيا..فإن لم تجدو اجابه على سؤالكم فإني ارحب بإستفساركم ^_^..

وهذه الصفحه ستكون تحت التحديث المستمر …

فيما يتعلق بالطلب وكيفيته:

- ندو هذا ايميلي (؟) اتمنى تضيفيني ابي اطلب منك تي شيرت..ما احب ارسل رسالة ايميل ممكن؟

إذا حاب\ة تطلب تي شيرت فأتمنى تراسلني على البريد لأني انا بعد ما احب المسنجر >_< ..والسبب هو ان جهازي يعلق بس اسجل دخولي فيه لكثرة المضيفين والمتحدثين! والايميل يساعدني اكثر في ترتيب الطلبات

- ندووووش انا بالرياض وحابه اطلب تي شيرت كيف التوصيل؟

التوصيل سهل ولا يفرق اذا كنتي في الرياض او جده او الشرقيه او اي مكان .. انا اتعامل مع الما اكسبرس اللي يوصلون الى منزلك بتكلفه مناسبه (التوصيل على المستلم) .. فلا تشيلون هم لأن ماعاد فيه شي اسمه (بعيد)!

- ممكن ترسمين لي رسم كروكي لطلبي اشوفه اول قبل ما ترسمين؟

للأسف هالطريقه ما اعتمدها لأن وقتي جدا ضيق ولا عندي وقت ارسم عالورق وارجع ارسم عالتي شيرت..وللمعلوميه , افكاري ما تطلع الا وانا ارسم عالتي شيرت يعني ما اعرف ارسم رسم مسبق واطبقه..وانما اتخيله وارتجله مباشره! المعذره >_<

- توصلين طلبات خارج السعوديه؟

ليش لاء؟ …^_^ أهم شي يكون لك عنوان صندوق بريد

- ابي تي شيرت لونه تركوازي ^_^ توفرين الوان زي كذا؟ملينا من الأبيض!

في الحقيقه يصعب توفيرها..والسبب اني اوفر ما يوفره السوق..يعني السوق هو اللي يتحكم في الألوان وليس انا

عادة احاول قدر الامكان اني اوفر اللون المطلوب..بس احيانا ما الاقيه..واللون الأبيض هو اللون الوحيد اللي يسهل توفيره.

- ممكن تعطيني رقم الجوال عشان اتفاهم معاك عالطلب بالتلفون لأني ما ادخل النت كثير؟

معذره..الطلب فقط بالإيميل..ولا اقدر أتعامل بطريقه اخرى

- انا بطلب تي شيرت بس متى تخلصينه لي؟

التي شيرت اخلصه في يومين.. بس ما اقدر اقول ان هذي هي المده فقط. لأنه قد يكون هناك طلبات تسبقك

فالمده تعتمد على ترتيبك في طابور الطلبات لدي .. وهالشي بتعرفه اذا راسلتني بطلبك..وكذلك عند تحويلك المبلغ بسرعه لأنه لو تأخر ممكن تأتي طلبات جديده و تزيد المده.

- ندى انا اول مرة اطلب بالنت..كيف طريقة التوصيل؟

التوصيل سهل جدا ولا يأخذ اكثر من يومين..مجرد يتصلون على رقمك وتوصف لهم منزلك وهم يجون الى باب بيتك ويسلمونك التي شيرت وتدفع لهم التوصيل. ومثل ما قلت التكلفه مناسبه جدا.

- اسم المستلم : شحروره.. ممكن اطلب؟

طبعا ممكن ^_^ لكن الأسماء الشبيهه (اسماء الدلع) غير مقبوله عند الطلب..أحتاج الى اسم جاد..لأن الأسم وصاحب الرقم يعطى الى شركة الشحن للأتصال به..فما حالك لو إتصل بك مسؤول الشحن ليسئلك عن عنوان منزلك قائلا : السيده شحروره؟؟؟

فيما يتعلق بالأسعار:

- ندوووش اذا طلبت كميه كبيره تعملين لي تخفيض؟؟

اممم..إذا صرت ماركه عالميه لك الحلاوة ^_^..اما الآن وانا بنت أعمل وحدي على طوابير طلبات وكل طلب ارسمه بيدي واقطع نفسي بالتفكير عشان اطلع فكره مناسبه لكل طلب وكل واحد له فكره غير عن الثاني.. ما اقدر اخفض صراحه -_-|||..

- أسعارك غاليه ياندى..تبيعين ذهب؟

مدري ليش احس ان رسمي أغلى من الذهب ^.^<<تكفين!..

معليش إعذروني بس الأسعار هذي تضمن استمراريتي في العمل.. بس أتمنى تحطون في الإعتبار 3 اشياء (الرسم يدوي – الأفكار متفرده ومتميزه – المصاريف الأخرى)

فيما يتعلق بالأدوات:

- أي الماركات تشترين منها التي شيرتات؟

امممم مافيه ماركه محدده..بصريح العباره اي تي شيرت يعجبني موديله وخامته وسعره اشتريه

بس كمثال لبعض الماركات اللي حبيت تي شيرتاتها : Bhs , Next, ZARA, Bershka, MNG

- من وين تشترين أدواتك؟

كلها من جرير بلا استثناء ^_^.

- ايش نوع الألوان اللي تستخدمينها؟

Textil Marabu الوان قماش.

- تستخدمين اقلام تحديد؟؟

بتاتا!

- هل تطبعين الرسمات بواسطة طابعه او آله معينه؟

الرسم يدوي بحت..ولا استخدم اي آلة. والرسم يكون مباشره على التي شيرت بإستخدام الفرشه والألوان

فيما يتعلق بحقوقي:

- ماتخافين لما تجاوبين عالأسئله بهالوضوح ان الناس تستخدم نفس ادواتك وتعمل نفس عملك؟

حلالهم ^_^ اهم شي يكون التنافس شريف وبدون تقليد..وانا ارحب .

- اكيد فيه سر خاشته عنا ..صح؟

امممم ايه فيه سر بس حتى انا ما اعرفه,مخشوش بمخي. ^.^

يافهيم السر بالإبتكار والتجديد والممارسه

- ندو ممكن استخدم رسوماتك في بزنس خاص بي؟

لا طبعا.. اساس عملي التميز..من الصعب الموافقه على شيء كهاذا وفي المقابل اوعد زبائني بأن التي شيرت لن يلبس مثله أحد!! أعتقد زبايني بيزعلون .. عشان كذا ارفض استخدام رسوماتي لأغراض تجاريه

- هل ممكن استخدم رسوماتك في عمل توقيع خاص بي , عمل نوته , خلفيه , ….الخ؟

طبعا ممكن ^_^ ويشرفني بعد. ولاتنسى تحط التوقيع الخاص بي.

- معليش احط لك بنر  في بلوق خاص فيني؟ أو في منتدى؟

هذا شرف لي .. موافقه طبعا..مع اني في السابق كنت ارفض هالشي

بس لاتنسى تحط عنوان المدونه عشان يسهل الوصول لموقعي ^_^

فيما يتعلق بالعروض التجاريه والتعاملات:

- أملك محل واريد بيع مجموعه من تي شيرتاتك في محلي..هل من الممكن ذلك ؟ واريد تخفيض؟

طبعا ممكن ^_^..اما بالنسبه للتخفيض فصعب جدا..قد اتكفل بالتوصيل^^

- لدي مشروع واريد منك المشاركه فهل تقبلين؟

شكرا لك..ولكن لا استطيع القبول ..فلي مشروعي الذي اريد العمل عليه ولا اريد الدخول في شراكات او قروض.

- ندوش عندنا معرض بنسويه وحابين تعرضين تي شيرتاتك فيه .شرايك؟

امممم على حسب توقيت المعرض وظروفي ..وانا لا امانع طبعا ^_^

فيما يتعلق بالقروب البريدي:

- ابي اشوف كل جديدك .. متى تعرضين التي شيرتات الجديده؟

شكرا على اهتمامك..وانا بعد يهمني اسمع ارائكم حول الجديد..وعشان كذا أسست القروب الخاص بي عالياهو

بإمكنك الإشتراك في القروب..وبيطلعك عالجديد اول بأول

- ندى ..إشتركت في القروب بس ماتفتح معاي الصفحه؟

حياك الله معانا..طريقة الإشتراك في القروب موضحه في صفحة (مجموعتي البريدية) إذا وصلت لك الرسال الترحيبيه فهذا يعني انه تم تسجيلك..ولا تقلق فالرسال ستصلك بإذن الله.

- هل ممكن اشارك بالرسائل في القروب؟

لا طبعا لأن القروب وضع لإرسال الجديد الى ايميلاتكم فقط..وليس للرسائل والمواضيع المحوله . اما اذا كنت تريد التعليق على الجديد بإمكانك الدخول على المدونه والتعليق ^^

فيما يتعلق بالمدونه (محلي الإلكتروني):

-ندو.صار لي فتره معلقه بس مارديتي على تعليقي ليش؟

أعتذر جدا .. فوقتي صار ضيق ولكن سأحاول الرد مهما طال الوقت.

- هل تقرأين جميع الرسائل والتعليقات؟ وهل تردين عليها بنفسك؟

نعم..كل التعليقات والرسائل التي ترسلونها اقرأها .. ويهمني كل كلمه تكتب في موقعي او ترسل على ايميلي

وانا اقرأها جيدا و بشكل يومي و أولا بأول..

لكن الرد على التعليقات في المدونه اعترف بأني اتأخر في ذلك بسبب إنشغالي ..أما رسائل الإيميل فإني ارد عليها مباشره

- ندى ليش تبيعين في مدونه؟

امممم..أجد المدونه مريحه في التعامل .. ومناسبه جدا لطبيعة عملي..فأنا لا ابيع فقط..إنما ادون واعرض فكر ورسم ايضا.

- هل عندك محل ؟

لا..انا اعمل على الإنترنت ومحلي الوحيد هو nadashope.wordpress والطلب عن طريق الإيميل

- بقولك شي ولاتزعلين.. تي شيرتات للبيع ومدونه ..ماينفع ابد!!

ماينفع ليش؟…إذا كان قصدك عالإحترافيه في العمل..فأنا اعتبر نفسي مبتدأه مادمت لا احمل إسم تجاري حتى الآن!..واذا كنت تقصد توظيف المدونه كمحل..فأنا ارى ان المدونه تناسب إحتياجاتي كرسامه ومدونه بالإضافه الى كوني تاجره.. وإذا كنت تقصد كونها مجانيه..فإني لا اعتزم شراء دومين ومساحه حتى اكون اسمي التجاري اولا.

فيما يتعلق بالرسم:

- ندو انتي قلتي انك ماترسمين أرواح عالتي شيرت..مع اني شفت لك رسمات عالتي شيرتات فيها ارواح؟؟

نعم ..كنت فيما سبق – اول ما بدأت- أرسمها وبدون العينين..ولكن الآن لم أعد وخصوصا بعد ما وضعت هذا القانون.

- ليش ماترسمين أرواح..؟؟ طيب على الأقل إيد او رجل او عين؟؟

الفتاوى في هذا الموضوع كثيره…حتى الشيوخ الذين أجازو رسم الأرواح لظروف خاصه أكدو على عدم وضعها في مكان مقدس ( كالتعليق على الحائط او لبسها على الصدر) والرسم على التي شيرت عادة يرمز للأشياء التي يقدسها الأنسان او يحبها جدا..لذلك لا ارسمها..أما الأجزاء كالعين و اليد مثلا فما أرسمها سدا لأي باب ممكن ينفتح في هذا الموضوع.

- ماذا عن لغة الأرابش..أو اللغه ذات الكتابه الأنجليزيه والنطق العربي..شفتك راسمه تي شيرت عليها هاللغه.وانتي قلتي انك ما ترسمينها؟؟؟

نفس السبب..كنت سابقا..ولكن لم أعد ارسم  الا في حالات كتابة اسم! ((أكرهها >_<))